El primeru de mayu una sola reivindicación pa tola clase obrera. ¡Volver yantar la llucha na cai!
Siguimos n’una perpetua crisis que fai a los ricos más ricos y a los probes más probes. La patronal y los gobiernos potencien una economía capitalista que supón quedase colos beneficios, y dir privatizando los nuesos servicios sociales. Eso si, cuando yos sal mal socializen les pérdides, pa que paguemos ente toes los sos escesos. Y mentantu, la culpa de la perpetua crisis ye de les trabayadores “por vivir pencima de les nueses posibilidaes”. Sicasí, nun se culpa a los banqueros y empresarios por robar, o al gobiernu por dexar que lo fixeren.
Y ente tantu siguimos padeciendo les últimes reformes llaborales. La de 2012 sumada a les dolce anteriores que s’asocedieron dende 1977 y que supuestamente nacieron p’ameyorar la situación sociu-llaboral de trabayadores pero que sirvieron xusto pa tolo contrario. Entá nun escaecimos de la postrera que tovía tamos esperando que la balten los que prometieren facelo cuando garraren el gobiernu. La CNT lleva años esixendo la so revocación, pero non yá d’esta reforma, nin de l’anterior, sinón de toes elles, lo que precisamos nun son pactos sociales nin reformes llaborales. Lo que nos fai falta ye organizanos y plantar cara.
Ye hora de perder el mieu, les trabayadores van pocu a pocu tomando concencia. Por necesidá vamos entamando y xuniendonos coles persones que sufren como nós.
Y equí ta la CNT con exemplos claros de que organizase horizontalmente funciona. Consiguiendo convenios y alcuerdos basaos nes nueses tables reivindicatives que traten de revertir parte de los efectos de les reformes llaborales de les que falemos. Exemplu d’ello son les victories en Hermano Ruiz Morantes, Urbaser, Estracciones Llevante, Alumalsa, nos Servicios Informáticos o los Servicios d’Emerxencies de la Xunta de Galicia, Eurest o los Amarradores del puertu de Barcelona. A estos suman otros frentes abiertos a día de güei, como foi la fuelga de trés díes en productos Florida con un 80% de participación, la fuelga na Comercializadora de Etisur, la llucha escontra la cesión illegal en Capgemini na Felguera, la hostelería en Xixón o les victories de los Figurantes de CNT con múltiples productores, Clece, Exeo, Wesser o Uber. Exemplos a los que se xunen la llucha y les meyores que van consiguiendo’l conxuntu de les nueses secciones sindicales.
Nun queremos dexar de recordar la caxa de resistencia pa dayos apoyu a les families de les trabayaores represaliaes na Felguera o la solidaridá que se debe a les piqueteres multaes nos piquetes del 8M en Xixón.
✅ Col nuesu modelu sindical aprendemos y facemonos fuertes comu clase trabayadora.
✅ El nuesu modelu sindical fai que la patronal nos tea mieu.
✅ Col nuesu modelu sindical créase conciencia de clase.
✅ Col nuesu modelu sindical nun delegamos les decisiones n’otres persones.
✅ El nuesu modelu sindical nun confía na clase política.
✅ Nel nuesu modelu sindical nun caben lliberaos nin subvenciones.
Esta ye la nuesa estratexa:
✅ Asamblees pa decidir y acción directa pa vencer.
✅ Lluchar polos nuesos derechos nel trabayu, avanzando na organización como trabayadores.
✅ LLuchar polos nuesos derechos na cai, al pie de toes aquelles persones y colectivos que se movilicen contra’l capitalismu, el fascismu y l’esplotación.
✅ Dende’l principiu la CNT nun tien más qu’un oxetivu: la emancipación total de la clase trabayadora que a la postre traerá una humanidá nueva.